వాడెవ్వడు??

ఎవ్వడు మలిచినవాడు?
భువికి పిలిచినవాడు
నిన్నెవ్వడు పెంచినవాడు?

పాలించి, ప్రేమించినవాడు
చెప్పించి, నొప్పించి, నేర్పించినవాడు

ఎక్కడి పాలపుంతలోనో
ఏ మూలో, ఒక చిట్టి గ్రహంలో
అణువంతలేని నీకు
ఆకాశమై రక్షణనిచ్చినవాడు

వాడెవ్వడు?
మహితాత్ముల సృష్టించి
నీకు గురువులనిచ్చిన వాడు?

బుధ్ధిని ఇచ్చి,
సిధ్ధి నీ సాధనకొదిలినవాడు?

నీ ఇష్టం

మానవ మస్తిష్కమొక మహాజలధి
తామర తంపరలుగా ఈదే చేపపిల్లలు,
తుచ్ఛమైన నీ ఆలోచనలు
బుధ్ధిని తిమింగలం చేసి శాసిస్తావో
నీచపు తిండి పెట్టి పోషిస్తావో
నీ ఇష్టం.